PRENTSA OHARRA - BUESA ARENAREN EROSKETA

 Gasteiz, 2026ko uztailaren 7a

Atzo, Josean Querejeta Saski Baskoniako presidenteak eta Ramiro González Arabako ahaldun nagusiak iragarritakoaren harira —Grupo Baskonia Alavesek Fernando Buesa Arena, aparkalekua eta inguruko lurrak erosteari buruz—, Deportivo Alaveseko akziodunen elkarte bakarra garen aldetik eta klubaren jabekide gisa, atzo gure sare sozialetan argitaratu genituen galderak helarazi nahi dizkizuegu, aurkeztutako eragiketaren arduradunei zuzendutakoak, baita proiektu horri buruz egiten dugun balorazioa ere.

KLUBARI:

● Zein da proiektuaren guztizko inbertsioa?

● Zeintzuk dira gauzatzeko aurreikusitako epeak?

● Zein da proiektuaren finantzaketa eredua?

● Zer neurritan eragingo dio proiektu honek gure klubaren, Deportivo Alavesen, egoera ekonomikoari?

● Nola eragin diezaioke eragiketa honek epe labur eta ertaineko kirol proiektuari? (Soldata-muga)

● Ondoko lurrak erosita, Mendizorrotza lekuz aldatzeko eta Gloriosoren etorkizuneko estadio berria bertara eramateko bidea prestatzen ari al da?

ALDUNDIARI:

● Zer arrazoik bultzatzen dute lurraldeko erakunde gorena ondare publikoa saltzera?

● Zer iritzi dute mugimendu honi buruz erakunde horretan ordezkaritza duten gainerako alderdi politikoek? Gai horren inguruan galdetu al zaie?

● Foru erakundean eztabaidatu al da mugimendu honen egokitasuna Araba osoaren intereserako, ala ahaldun nagusiaren erabaki pertsonala izan da?

● Mugimendu honek atea irekitzen al dio Deportivo Alavesen etorkizuneko estadio berria Zurbano inguruan kokatzeari?

Interes publikoko galdera horiei erantzuna jasotzeaz harago, gai honi buruzko gure hausnarketak ere helarazi nahi dizkizuegu.

Kezkaz ikusten dugu nola, ondare publikoa babestu eta baliabideak gizarte ongizatearekin zuzenean lotutako alorretara bideratu beharrean, gure erakundeek —kasu honetan Arabako Foru Aldundiak— akordio pribatu ilunak (salmentaren baldintzei buruz ez baita ezer ezagutzen) egiten dituzten Fernando Buesa Arena bezalako instalazio publiko bat alde batera uzteko.

Haren titulartasun publikoa bermatzea azpiegitura estrategiko baten zerbitzu publikoaren bokazioa defendatzea da, kulturara eta kirolera sarbide demokratiko eta unibertsala bermatuko dituena. Haren salmentak ondare publiko orori lotutako ezinbesteko kohesio komunitarioa hausten du. Eta hori gutxi balitz, Fernando Buesa Arenaren hobekuntza proiektua palkoak eta VIP guneak sortzean oinarritzen da. Hau da, herrikoiak izan diren ikuskizunak kutsu klasistadun proposamen bihurtzeko joera geldiezin batean.

Haren pribatizazioaren iragarpena albiste oso txarra da, gainera udako opor garaian eta Munduko Futbol Txapelketa jokatzen ari den unean iritsi dena. Salmenta honekin batera, Euneizen handitzea ere iragarri da; hezkuntza-proiektu pribatu eta elitista bat, alegia.

Bada, hezkuntza publikoan baliabideak inbertitzeko duten betebeharra bete beharrean, gure erakundeek (atzo Aldundiak) txalotu eta bultzatu egiten dituzte horrelako proiektuak, gure hezkuntza sistemaren ezkutuko pribatizazio progresiboa sustatuz. Atzo ezagutu genuenaren arabera, pribatizazio hori Lanbide Heziketara ere iritsiko da, Euneizen eskutik. Azken batean, Arabako gizarteari gola, edo hobeto esanda, hainbat gol sartu zaizkio angulotik.

Eta Alaveszale garen aldetik, ezin dugu ezkutatu gure harridura, gure klubak etengabe aurkezten dituen asmo handiko proiektu ekonomikoen aurrean, kirol talentua atxikitzeko ageriko zailtasunak dituen bitartean. Azal diezaguke inork nola egingo zaien aurre milioika euroko inbertsio horiei, diru-sarrera iturri nagusi eta ia bakarra bermatu gabe?

Ez dago gogorarazi beharrik diru-sarrera horren oinarria, bai ala bai, gure Glorioso Lehen Mailan mantentzea eta sendotzea dela.

Era berean, ezin dugu albo batera utzi Alaveszaleentzat ez ezik, Gasteizko gizartearentzat eta merkataritza sarearentzat ere berebiziko garrantzia duen gai bat: Mendizorrotzaren etorkizuna.

Atzo iragarritako mugimenduak, inguruko lurren erosketa aipatzen duenak, badirudi Alaveszaleen etxea Zurbano ingurura bideratzen duen seinale dela, nahiz eta oraindik ez dagoen baieztapen ofizialik. Ez ote da izango proiektu horrek gizartean sortzen duen arbuio nabarmena ez datorrela bat udal eta foru hauteskundeak hilabete gutxira izatearekin? Behin hauteskunde horiek igarota iragarriko al zaigu behin betiko zerbait?

Hala balitz, herritar guztiei dei egiten diegu alderdi hori ere kontuan har dezaten gure ordezkariak aukeratzerakoan.

Eta gure ordezkariez ari garela, Udalak asmorik al du bere instalazioaren aldeko jarrera hartzeko eta hura defendatzeko?

Joan den urtarrilaren 20an Mendizorrotzaren etorkizunari buruz bidali genuen komunikazioarekin egin genuen bezala, jakinarazten dugu ohar hau tokiko komunikabideei, foru eta udal gobernu taldeei, gure lurraldean ordezkaritza duten alderdi politikoei (eskuin muturreko ordezkaria izan ezik), eta merkataritza nahiz ostalaritza elkarteei helarazi zaiela.

GUREA DA – AKZIODUN URDIN-ZURIEN ZUZENDARITZA BATZORDEA

Comentarios

Entradas populares de este blog

Sobre aforo, número de socios y presencia visitante; ¿te encajan las cifras oficiales?

CESIÓN DE CARNET

NOTA DE PRENSA - ANUNCIO COMPRA BUESA ARENA